Arabako emakumeek historian egindako lanari aitortza egin nahi izan dio Aldundiak martxoaren 8ko ekimenen barruan. Atzo egin zuten ekitaldia Artium Museoan, eta zazpi emakumek jaso zuten haiek utzitako ondarea balioan jartzeko aintzatespena.
Horien artean, Rafaela Garrido Masek jaso zuen saria, Laudioko industrializazio prozesuan lan egin zuten emakumeen izenean.
Rafaela Garrido, Laudioko emakume langileen ordezkari
Aldeaquemadatik (Jaen) Laudiora etorri zen Rafaela Garrido 1995ean, aukera eta etorkizun hobeen bila. Eskualdea industrializazio bidean zegoen garai hartan, beste hainbat emakumeren antzera, bera ere fabrikan aritu zen, lan baldintza gogorretan eta gizonak nagusi ziren sektorean.
Ekitaldian, Arabako diputatu nagusi Ramiro Gonzálezek azpimarratu zuen aitorpen horiek "justizia ekintza bat" direla. "Inoiz ez ditugu ahaztuko aurrera eginarazi diguten emakumeak, garrantzitsuak izan baitira gizarte honen aldaketetarako, eta eredugarriak direlako belaunaldi berrientzat eta etorkizuneko belaunaldientzat", adierazi zuen.
Itzaletik ikusgarritasunera
Paquita Sáez de Urturi, Isabel Mellén, Maria Ángeles Reso, Garbiñe Astondoa, María Pilar Peciña eta Inés Alonso izan dira Rafaela Garridorekin batera omenduak.
Haiek dira, era berean, Arabako Emakumeen Aztarnak Historian proiektuko protagonistak. Egitasmo hori, hain zuzen ere, "komiki batean eta ikus-entzunezko hainbat materialetan gauzatu da, eta Arabako landa eremuko kuadrilletako emakumeek historian zehar egindako ekarpenak berreskuratu eta nabarmendu nahi ditu, eta, aldi berean, bigarren mailara baztertu dituzten desberdintasunak nabarmendu".
Emakumeen Nazioarteko Egunaren harira, aldarrikapenak egiteko tartea hartu du modu honetan foru erakundeak, eta "konpromiso bikoitza" adierazi du, "Arabako emakumeen memoria historikoarekin eta feminismoa mugimendu sozial, politiko eta kultural gisa aldarrikatzearekin, berdintasunezko eta diskriminaziorik gabeko etorkizuna lortzeko".