Martxoaren 21ean izango da Arrazismoaren Kontrako Nazioarteko Eguna eta Laudioko Udaleko kale hezitzaile zerbitzuak aukera baliatu nahi du jatorri anitzeko kuadrillak harremanetan jartzeko futbito txapelketaren bidez.
Berez, xedea ez da lehiakortasuna sustatzea, kirolaren aldeko eta arrazismoaren kontrako mezua zabaltzea baizik. Izan ere, gizartean zabaldutako eta errotutako arazoa da arrazakeria, baita gazteen artean ere.
Horregatik, hain zuzen, kale hezitzaileek aukera baliatu nahi dute ikustarazteko Lamuza parkean (eta herrian, oro har) jatorri anitzeko kuadrillak ari direla futbitoan jokatzen, euren arteko partidak antolatzeko eta elkar ezagutza errazteko. "Gazte ugarik jokatzen dute, baina kuadrillak ez dira nahasten", adierazi dute kale hezitzaileek.
Kale kirola
"Arrazakeriaren Kontrako Mundialito" gisa izendatu dute egitasmoa eta kale izaera izango du, futbitoak bezala. Ez da epailerik egongo eta gazteek eurek izango dute arauak betetzeko ardura. Ez da egongo saririk irabazleentzat, baina guztien artean mokadua partekatzeko aukera izango dute iluntzean.
Partidak 17:00etan hasiko dira Lamuza Parkeko futbito zelaian eta interesdunek 622 679 889 telefono zenbakira dei dezakete izena emateko. Instagram bitartez ere egin daiteke, @laudio_kalehezitzaileak kontura mezu zuzena idatzita.
Laudioko Udaleko kale heziketa zerbitzuak herriko gazte kuadrilla guztiei luzatu die gonbita izena emateko eta arratsalde dibertigarria igarotzeko.