Asteburu honetan hasi da Aiarako Biraren XXXV. edizioa. Atzo arratsaldean abiatu zen lehen etapa Laudioko Aldai plazatik. Cesar Solaun txirrindulari profesional ohia arduratu zen zinta mozteaz, Ainize Gastaka alkatearekin batera.
Jarraian abiatu ziren txirrindulariak, eta lau itzuli egin zituzten guztira herrigunean zein inguruko auzoetako barrena, 43 kilometro orduko bataz besteko abiadurarekin.
Gran Canaria Bike Team taldeko Dario Gimeno Pardo gailendu zen lehen proba horretan, eta Ibai Colmenero txirrindulari aiaraldearrak bosgarren zeharkatu zuen helmuga.
Antolatzaileek nabarmendu dute nazioartera jo duela aurtengo edizioak, Turkiako Selekzio Nazionaleko kideak bertaratu baitira proban parte hartzeko:
Bigarren etapa, Orozko eta Madaria artean
Gaur goizean, aldiz, bigarren etapa egin da, Orozkotik Madariara joan dena.
Antolatzaileek zuzenean emititu dituzte bi lasterketak:
Hurrengo bi asteetan ebatziko da aurtengo bira, bi etaparekin asteburu bakoitzeko:
- Martxoak 22, 16:00etan Okondo-Markuartu (kronoeskalada).
- Martxoak 23, 10:30ean Amurrio-Amurrio.
- Martxoak 29, 16:00etan Artziniega-Artziniega.
- Martxoak 30, 10:30ean Arespalditza-Arespalditza.
Probaren webgunean ikusi daiteke lasterketa bakoitzari lotutako informazio guztia.