Ruperto Urkijo Maruri musikariak omenaldia jasoko du martxoaren 29an Laudion, oroitzeko 1875 urtean jaio zela. Ekitaldi xumea izango da. Lehenik eta behin, meza egingo dute 12:00etan Lamuza plazako parrokian, 12:30ean Arloteek bere abesti ezagunenak kantatuko dituzte eta kantu-kalejiran arituko dira 13:15etik 14:00ak arte.
Horrez gain, Ruperto Urkijo Bola Elkarteak jaurtiketak egingo ditu egun osoan bolatokian.
Laudioko musikaria
Lamuza plazan estatua duen sortzailea 1875eko martxoaren 27an jaio zen Goienuriko Ibarra baserrian. Sei anai eta arreba bakarra izan zituen eta oso goiz hasi zen bere harremana musikarekin. Hain zuzen, bederatzi urterekin herriko parrokiako organistaren eskutik trebatu zen eta txirula jotzen ikasi zuen.
Zerbitzu militarrean Kubako Gerran borrokatu behar izan zuen Urkijok
Horri esker, erromeriaz erromeria aritu zen, baina bere ibilbidea errotik moztu zuten arotz ikasketek eta, bereziki, Kubako Gerrak. Guda horretan egon zen soldadu gisa (zerbitzu militarra betetzeko), korneta gisa. 1897an domina jaso zuen batailetan izandako protagonismoagatik.
Gerratik itzultzean arotz lanak hartu zituen Bilbon eta Campos Antzokian ere aritu zen. 1925ean Laudiora itzuli zen bizitzera, Bizkaiko hiriburua utzita.
Garai horretan jadanik sortuta zuen bere abesti ezagunena, Lusiano y Clara, zeina Bilboko Udal Musika Bandarekin estreinatu zuen 1919an. Kanta famatuagoa bilakatu zen En el monte Gorbea izenarekin. Izan ere, mendi horretako artzain baten amodio istoria deskribatzen du. Areatzako Udalak plaka bat jarri zuen bere omenez, abestiak izandako onarpena aitortzeko.
Musikaria konposizio gehiagoren egilea izan zen, Inauteriei, zezenketei, jaiei edota Gardeari lotuta. Horrez gain, antzezlanak ere idatzi zituen.
Gerra eta espetxea
1937an, indar faxistek aurrera egiten zutela ikusita, Ruperto Urkijok Laudiotik ihes egin zuen. 1940an, guda amaituta, Laudiora itzultzen saiatu zen, baina Kataluniako mugan atxilotu eta espetxeratu zuten. Bere anaiaren esku-hartzeari esker (Miguel Urkijo alkate frankista) eta 5.000 pezetako isuna ordaindu eta gero, aske geratu zen.
1940an espetxeratu zuten, gerra zibila amaitzean etxera itzultzen ari zen bitartean
Diktadurak iraun bitartean herriko bizitza kulturala nabarmen mugatu zuten agintariek, baina 1965ean omenaldi jendetsua antolatu zioten laudioarrari, eta herritar andanak Avenida zinema bete zuten. 1970ean zendu zen Ruperto Urkijo.
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!