Luis Garcia Berlangaren zinemak eragin handia izan du betidanik Kepa Sojorengan. Zinemagile laudioarrak Bienvenido Mister Marshall filmari buruzko lan mardula plazaratu zuen 2009an. Handik zazpi urtera El Verdugo-ren azterketa argitaratu zuen, Naullibres argitaletxearen ‘Guias para ver y analizar’ bildumaren barruan.
Orain, aldiz, beste ale bat osatu du sail bererako, Berlangaren beste film entzutetsu bat ardatz hartuta: Placido. Atzo aurkeztu zuen liburua Gasteizko Elkar liburudendan, Santiago de Pablo EHUko katedradunarekin. Gaur, aldiz, Bilbon egingo dute ekitaldia, Felix Linares aurkezle eta kazetariarekin.
Artearen esparruko ikasleentzako berariaz pentsatuta osatu du liburua Sojok, bildumako gainontzeko aleek duten eskema jarraituz. “Bilduma honek baditu berezitasun batzuk liburu guztietan agertzen direnak: teknikoki aztertzen dira pelikulak, euren jatorria, sinopsia, jasotako kritikak… horrez gain, planoz plano eta sekuentziaz sekuentzia aztertzen da filma, eta zuzendariari edota bere beste lanei ere egiten zaie aipamena”, azaldu du zinemagileak.
Berlanga “maisua” da Sojorentzat, eta kosta egiten zaio bere filmografiako pelikula bakar bat aukeratzea. Zuzendari laudioarrak aitortu du Placido-ren eragina sumatu daitekeela berak eginiko lanetan. “Berlangak plano sekuentzietan planteatu zuen filma hori, eta nik ere mota horretako hainbat sekuentzia osatu nituen La pequeña Suiza pelikulan”, azaldu du. Bere hitzetan, “oso konplikatua” da Berlangak egiten zuena, kamara etxe baten barruan mugitu behar zelako "bederatzi edo hamar pertsonai" koordinatuta.
Proiektu gehiago
Atzoko eta gaurko saioez gain, Sojok ez du momentuz beste aurkezpenik agendan, baina ez du ezta geldi egoteko asmorik. Unibertsitateko irakaslea izanda, Espainiako zinemari buruzko argitalpenetan parte hartzen du sarritan, baina zinemagintzara itzultzea ere du buruan. Esparru horretan ere baditu proiektu batzuk esku artean, eta bileretan dago horiek aurrera ateratzeko. Hala ere, dio oraindik goiz dela ezer aurreratzeko; “ateratzen direnean hitz egingo dugu”.
