Laudioko azokako baserritar eta ekoizleek elkarlanean jarduteko marka aurkeztu dute gaur: Etxeko Zaporeak. Mokadu txiki baten laguntzaz, osteguneko merkatua baliatu dute egitasmoaren berri emateko. Marka berriak azokako produktuen kalitatea eta herriko tradizioa balioan jartzea du helburu. Izan ere, azpimarratu dutenez, azokak "Laudioko bihotza" izan dira hamarkada luzeetan. Gaur egun ere, erreferentziazko elkargune bilakatu dira ostegun eta larunbatetako baserritar merkatuak.
Halaber, azokak, salerosketarako gunea izatetik harago, komunitatea batzeko espazioak ere badirela aldarrikatu dute: "Komunitatea elkartzeko gunea da, istorioak partekatzeko tokia, eta bertako produktuek zaporea ez ezik, historia ere badute", aldarrikatu dute aurkezpen ekitaldian.
Tokiko ekoizleek egiten duten lana balioan jartzea eta baserritarrak elkarlanean jartzea da Etxeko Zaporeak markaren helburua: "Baserriak gure gastronomiaren eta kulturaren oinarri izan dira eta izaten jarraitzen dute. Bertan, lurra errespetuz lantzen da, animaliak arduraz zaintzen dira eta belaunaldiz belaunaldi jakituria transmititzen da. Hau guztia gure azokako produktuen bidez islaturik dago: barazki freskoak, gazta artisauak, eztia, ogia, gozogintza eta askoz gehiago. Elikagai hauek ekoizleen esfortzua eta maitasuna daramate berekin".
Azoka, gune dinamikoa
Baserriko lana eta produktuak sustatzeaz gain, azoka bera ere indartu nahi dute markaren barruan bildu diren ekoizleek. Azoka "gune dinamiko eta aberasgarria" izatea nahi dute. Horretarako, larunbat bereziak antolatuko dituzte hilabetean behin, azoka eguna baliatuz. Bertan, sukaldaritza tailerrak, produktu-dastaketak edota erakusketak eskainiko dituzte, besteak beste. "Azoka hau erreferente bihurtu nahi dugu, ez soilik erosketak egiteko, baita gozatzeko, ikasteko eta gure sustraiekin konektatzeko ere".
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!