Merkatu eguna probestu zuten atzo Laudioko udal langileek protesta egiteko. Herriko plazara atera ziren tokiko gobernuak langileei eragiten dieten zenbait gai konpon ditzala eskatzeko. Azaldu zutenez, bizi duten lan egoerak "ezinegona, ziurgabetasuna eta kezka" sortzen ditu behargin publikoen artean, eta horrek eragin zuzena du lan osasunean.
Mahaigainean jarri dituzten aldarrikapenak "urgenteak" direla azpimarratu dute ELA eta LAB sindikatuek. Alde batetik, langileen egonkortze prozesu guztiak berehala amaitzea eskatu diote Udalari, baita lanpostuen balorazioa behin betiko onartzea ere. "Balorazio hori 2023ko apirilean onartu zen hasieran, eta, ordutik, gordeta dago", azaldu dute langileen ordezkariek.
Premiazkotzat jo dute ere libre dauden Udaleko lanpostu guztiak berehala betetzea: "Lanpostu hutsak, laneko bajak, erretiroak... Lanpostu horietako batzuk hutsik daude 2024tik edo lehenagotik ere: ofizial iturgina, ofizial udaltzainburua, alkatetzako administraria, hiri mantentze lanetako ofiziala, garbiketa burua...". Hautaketa prozesu izendapenarekin amaitzea ere bada langileen aldarrikapenetako bat, "langile gabezia handiak" dituen brigada egonkortze aldera.
Azaldu dutenez, egoera hauek guztiek langileengan ez ezik, herritarrek jasotzen duten zerbitzuan ere eragiten dute kaltea. Bide horretan, protestan jarraituko dutela adierazi dute. Martxoko Udal Osoko Bilkurara eramango dituzte aldarrikapenak, datorren martxoaren 31n.
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!