Elkarretaratzea egin zuten atzo Laudioko udal langileek, iragan asteko aldarrikapenekin jarraitzeko. Eskakizun “urgenteak” dira mahai gainean jarri dituztenak, LAB eta ELA sindikatuek adierazi zutenez.
Alde batetik, langileen izendapenak betetzea eta prozesua ahalik eta lasterren bukatzea exijitu diote Udalari, baita lanpostuen balorazioa behin betiko onartzea ere. Horretaz gain, 2020ko peoi espezialisten Enplegu Publikoaren Eskaintzarekin amaitzea ere eskatu dute, eta langileon lan-osasuna bermatzeko neurriak ezartzea.
EAJren babesa
Laudioko EAJk “erabateko babesa” adierazi nahi izan die udal langileei, eta EH Bilduren kudeaketa kritikatu: "Ezin dugu onartu Gobernu Taldeak Udalaren funtzionamenduari eusten diotenen beharrak alde batera uzten jarraitzea. EH-Bilduk giza baliabideak kudeatzeko erabateko ezintasuna erakutsi du, funtsezko prozesuak blokeatuz eta langileen bidezko aldarrikapenak mespretxatuz” gaitzetsi du Ander Larrinaga zinegotziak.
Era berean, azpimarratu dute Enplegu Publikoaren Eskaintza “justifikaziorik gabe” atzeratu dela, eta aurreko legegintzaldian “prozesu hori oso aurreratuta” utzi zuela EAJk.
Jeltzaleek adierazi dutenez, egoerak laudioar guztiei eragiten die, “administrazio desantolatu eta ez-eraginkor baten ondorioak jasaten baitituzte”. Hortaz, oposizioko talde nagusiak EH Bilduri eskatu dio “blokeo jarrera bertan behera uzteko eta arduraz gobernatzen hasteko.”