Guardian enpresako 171 langileen kaleratzea eragingo duen enplegua erregulatzeko espedientearen kontsulta epea amaitzear dago eta ez dago adostasunik aldeen artean.
Ostiralean hasierako eskaintza hobetu ondoren, multinazionaleko zuzendaritzak proposamen berria egin die langileei eta hauek uko egin diote aho batez.
"Ez gaude prest espedientea sinatzeko, ez duelako ez hanka ez bururik, ez dugu enplegu suntsiketa babestuko", azaldu dute iturri sindikalek.
Gauzak horrela, asteazkenean izango da bi aldeen arteko azken bilera eta, akordiorik egongo ez balitz, epaitegira jo beharko lukete lantegia ixteko.
Enplegua eztabaidagai
Espedientea sinatzeko asmorik ez badute ere, bestelako akordioak lortzeko prestutasuna agertu dute beharginek. Adibidez, proposatu dute egungo langileei lehentasuna ematea kontratazioan, lantegia berriro irekiko balitz inbertsore berriekin.
Edonola ere, enpresaren eskaintza eremu ekonomikora mugatu da eta beharginentzat enpleguaren bermea da benetan eztabaidatu behar den gaia. Horregatik, bileraren ondoren egindako batzarrean Enpresa Batzordeko kide guztiek ukatu dute enpresaren proposamena.