Iaz ekin zioten Aretako bizilagunek Aretako Eguna ospatzeari, herri izaera aldarrikatzeko eta bizilagunen arteko harremanak estutzeko helburuz. Aurten ere egun osoko egitaraua prestatu dute.
Aurtengo edizioak, baina, berritasun bat izan du: Aretako Errepublika Independenteko karnet edo nortasun agiriak banatu dituzte, herritar txiki, gazte eta nagusien artean. "Txartel honek ez du balio bankuan mailegu bat eskatzeko, baina ez du iraungitze datarik, hemendik eta urte batzuetara begiratzean orain bezain gazte jarraituko dugu. Aretar guztiok batzen gaituen karneta da, eta horrek egiten du berezi", aldarrikatu dute eguerdiko ekitaldian.
Goizean, nortasun agiriak banatzeaz gain, kalejira egin dute, buruhandi, trikimako eta txistulariek lagunduta. Eskola pareko hagan bandera igo eta gero, Untzueta dantza taldeak eskaini du emanaldia.
Arratsaldean zehar ere hainbat ekintza egingo dituzte: puzgarriak egongo dira parkean, eta kutxa-eskalada jolasa ere egingo dute. Gauera arte luzatuko da jaia, Gauargi erromeriarekin (20:00etan) eta DJ Katiuskaren saioarekin (22:00).
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!