Atzo igaro zuten azken egun osoa Laudio Institutuko ikasleek Finlandian. Hain zuzen, Pyhäjokiko eskolan igaro zituzten orduak, eguneroko jardunetan parte hartzen.
Musika tailerrarekin hasi ziren eta “kantele” musika tresna tradizionala jotzen ikasi zuten. Gero, abestu eta jo zuten Kalevala finlandiar olerki epiko bildumaren kanta bat. Ondoren, ikasleek beste tailer bat egin zuten euskal eta finlandiar ondare kulturaren inguruan.
Gazteentzako ekintzak ez ezik, hezitzaileentzako jarduerak ere egon ziren. Horrela, Elina Vehkalak, Pyhäjokiko Hezkuntza sailaren arduradunak eskola bisitatu zuen eta Laudioko irakasleek harekin egoteko aukera izan zuten, bi herrietako hezkuntza sistemei buruz aritzeko.
Ohiko goizeko bazkalordua eta gero, arte tailerrari ekin zioten ikasleek. Berriro, Kalevala olerki bilduman oinarrituta, marrazkiak sortu zituzten kondaira horien ikonografia inspirazio moduan hartuta.
14:30ean amaitu zituzten saioak eta harrera familiekin azken eguna gozatzera joan ziren aiaraldearrak.
Argazkiak: Laudio BHI