Gaur aurkeztu dute Lezeaga Aretoan Laudioko II. Jardunaldi Feministak, "Zukutu feminismoa" leloa dutenak. Guztira, dozena bat ekintza izango dira eta Nagore Gomara zinegotziak eta Esti Ibarrolak azpimarratu dutenez, asmoa ez da soilik orain gori-gorian dauden eztabaidak lantzea, baizik ere feminismoaren adierazpen anitzak ere eskaintzea.
Iaz 400 bat lagunek parte hartu zuten eta ekimenari eutsita indartu eta jarraipena eman nahi diete jardunaldiei.
Berez, jardunaldiak maiatzaren 16an hasi eta 30ean amaituko dira. Aurten egitasmoari Christo Casas idazleak emango dio hasiera Maricas malas liburu aurkezpenarekin, 18:00etan Lezeaga aretoan.
Hurrengo egunean, maiatzaren 17an, Entre dos mundos antzezlana eta foroarekin jarraituko dute Kasinoan (19:00).
Laudioarrak ere presente
Hurrengo saioko protagonistak herrikoak izango dira. Hain zuzen, maiatzaren 19an egingo dute Kasinoan eta Kuluxka Antzerkiaren Txontxongilo artikulatua obra, 19:00etan. Lan hori Lezeaga Aretoan bertan egiten den tailerrean sortu du Laudioko emakume talde batek.
Zinea ere ez da faltako, Zinegoaken eskutik; Bilbon urtero egiten den LGTBIQ+ nazioarteko zinema jaialdia. Maiatzaren 20an film laburrak proiektatuko dituzte eta hurrengo egunean, maiatzaren 21ean pelikula luzea. Bi saioak Lezeaga aretoan izango dira arratsaldeko 18:30etik aurrera.
Umoreak ere bere tartea izango du maiatzaren 22an Ztandap ikuskizunarekin Kasinoan 18:30ean.
Prostituzioaren eta sexu esplotazioaren aurpegi berriak
Programak maiatzaren 23an jarraituko du 18:00etan Lezeaga Aretoan Towanda Rebels ekintzaile feministek egungo sexu-esplotazio digitalaren inguruan eskainiko duten hitzaldiarekin: Ezkutuko prostituzio berria: sugar dating, Only Fans eta ahalduntze faltsua.
Maiatzaren 26an emakume migratuek eurek sortutako antzezlanak hartuko du Kasinoa 18:30ean.
Zaintzari buruz hausnartzen
Maiatzaren 27an zentralitate handiko gaiari buruz eztabaidatuko dute Lezeaga Aretoan 18:30ean. Hain zuzen, zaintzari buruzko gogoeta feminista saioa antolatu dute. Marina Sagastizabal soziologoak, Laudioko Askotariko Emakumeen Kontseiluak eta Tania Siriany, Hegoaldetik Enarak kooperatibatiko kideak hartuko dute parte
Hurrengo egunean bestelako giroa eskainiko dute Kasinoan 19:00etan Irantzu Varelaren Manólogo bakarrizketarekin.
Horrez gain, maiatzaren 29an Izaskun Alonso laudioarrak Artea tresna gisa: desberdintasunaren salaketa, emakumeen artearen historiaren balio eta sorrera hitzaldia emango du Lezeaga aretoan 18:00etan.
Hurrengo egunean Aldai Plazak emakumez osatutako Yare Sound System proiektu musikalaren kontzertua egongo da Laudio reggae/soundsystem musikaz betetzeko.