Lortu dute. Euskal Ligatik Espainiako Ligara igo da CD Laudioko gazte taldea, gaur arratsaldean Ariznabarra 2-1 garaituta.
Ez da lan makala izan. Euriak jokoa zaildu die jokalari guztiei, baina laudioarrek senide, lagun eta zaleen berotasunarekin kontatu ahal izan dute, eta 21. minutuan sartu dute lehen gola, Kerman Artoren eskutik. Baina euforiak ez du asko iraun, handik hiru minutura iritsi baita Ariznabarraren kontraerasoa, eta berdinduta amaitu dute lehen zatia.
Indartsu iritsi dira CD Laudiokoak partidaren bigarren txanpara, 46. minutuan sartu baitu bigarrena Ander Vallejosek. Ondoren, markagailua bere horretan mantentzen jarri dituzten indar laudioarrek, eta lortu egin dute. Arbitroaren txibilituaren soinuarekin batera lehertu da giroa Ellakurin. Suziri, bengala eta bonbo hotsak nausitu dira kirolgunean, eta dozenaka lagunek egin dute salto zelaira, garaipena jokalariekin batera ospatzeko.
Izan ere, ez da makala lortutakoa. 1990. hamarkadaren hasieran erdietsi zuen azkenekoz Laudioko taldeak Espainiako Jubenilen Ligara igotzea. Hiru hamarkada beranduago, ametsa egi bilakatu da berriz Ellakurin.