Andaluziar Etxeko ordezkariek prentsa oharra zabaldu dute sentitzen duten ezinegonaren eta nahasmenaren berri emateko. Izan ere, salatu dutenez, Laudioko parrokoak eragotzi du duela ia 40 urteko ohiturarekin jarraitzea igandean.
Berez, Andaluziar Etxean meza egiten dute duela hiru hamarkada baino gehiago Rocioko ama birjinaren omenez, baina aurten ez da izango, herriko apaizak ez duelako ahalbidetu.
Parrokoak exijitu du meza hori elizan egitea eta oztopatu du beste erlijioso batek ere eskaintzea. Andaluziar Etxeko kideek, berez, argi eta garbi eskertu nahi izan dute Gasteizko Apezpikutzako bikarioak izan duen jarrera: "Ulertu du tradizioaren balioa eta izaera eta bitartekari lanak egin ditu tokiko parrokoarekin".
Gasteizko esku-hartzea, ordea, ez da nahikoa izan eta Laudioko apaizak ez du erraztu igandean Rocioko ama birjinaren omenezko meza egitea. "Hamabi apaiz baino gehiagorekin jarri gara harremanetan eta ez dute inolako arazorik adierazi hona etortzeko, baina Laudioko parrokoak ez die utzi", azaldu dio Andaluziar Etxeko kide batek Aiaraldea Komunikabideari.
Meza ez, baina omenaldia bai
Gauzak horrela, meza ez bada ere, Andaluziar Etxeko kideek Rocioko ama birjinari omenaldia egingo diote, "betiko maitasun, fede eta errespetuarekin".
Izan ere, eutsi nahi diote euren eginkizunari: "Kulturen arteko zubiak eraikitzea, errespetua sustatzea eta gure erroak defendatzea, elkarbizitzaren eta elkar ulertzearen bitartez".