Autoglas-Glavistako kaleratzeak bidegabeak izan zirela ebatzi du EAEko Auzitegi Nagusiak. Epaitegi gorenak aintzat hartu du ELAk aurkeztutako helegitea, eta atzera bota ditu enpresek aurkeztutakoak. Hala azaldu du sindikatuak prentsara bidalitako ohar baten bidez.
Langile erakundeak azaldu duenez, Auzitegi Nagusiak Guardian eta Parter Capitalen enpresak kondenatu ditu kaleratutako beharginen kalte-ordainak euren gain hartzera. Modu horretan, epaiak bat egiten du iaz Gasteizko lan arloko epaitegiak eginiko ebazpenarekin.
Sententziaren aburuz, Guardian eta Parter Capitalek ez zuten fede onez jokatu espedientearen kontsulta epean, hainbat dokumentazio entregatzeari uko egin ziotelako, besteak beste.
Gauzak hala, epaiak ondorioztatu du langileei "iruzurra" egin zaiela, eta "enpresa talde patologikotzat" jo du Guardian eta Parter Capitalen arteko harremana.
Sententziaren aburuz, Guardian eta Parter Capitalek ez zuten fede onez jokatu espedientearen kontsulta epean, hainbat dokumentazio entregatzeari uko egin ziotelako.
ELAren aburuz, ebazpenak bat egiten du langileek behin eta berriro salatu dutenarekin: "Guardian Europe-tik operazio bat antolatu zela Autoglasen jarduerarik gabeko egoera sortzeko, 2020ra arte enpresa harena baitzen, eta une horretan gezurrezko salmenta egin zuen".
Gauzak hala, sindikatuak "oso positiboki" baloratu du sententzia, eta nabarmendu du Auzitegi Nagusiko epaileetako batek boto partikularra eman duela. Epaile horren aburuz, ELAren helegitea osorik onartu beharko litzateke, kaleratzeak deuseztatuz.