Ekain amaieran ospatuko ditu Laudiok aurtengo sanpedropekoak, hilaren 27an eta 28an. Jarduerak ostiralean abiatuko badira ere, larunbata izango da egunik handiena. Gainera, aurten, Laudio Harro eragilearekin batera osatu du jai batzordeak egitaraua, eta larunbat arratsaldean izango du horrek isla.
Ostiraleko egitaraua xumea izango bada ere, motorrak berotzeko balioko zaie herritarrei. Etxeko txikienek ere izango dute ondo pasatzeko tartea, hain zuzen ere, 17:30etik aurrera puzgarriak egongo baitira Aldai plazan. 19:00etan ekingo diote musika taldeek oholtzaratzeari: Caledonian Road talde bilbotarraren txanda izango da lehena, eta rock doinuak zabalduko dituzte plazan. Shiver taldea helduko da ostean, hainbat bertsio eta abesti propioren bat ekartzeko. Walter Ego talde laudioarrak emango dio gauari itxiera.
Larunbatean goizean goizetik abiatuko dira ekintzak, eta gaueko ordu txikitara arte luzatu. 09:00etan emango diote hasiera sukalki eta tortillen ohiko txapelketari, eta bai kuadrillen eta baita herritarren parte hartze handia espero da. 12:00etan buruhandiak aterako dira, haur eta gazteen atzetik korrika eta jolasean. Ordu berean aurkeztu beharko dituzte tortilla txapelketan parte hartu dutenek prestatutako jakiak, eta 12:30ean izango da horien sari banaketa. Sukalkien aurkezpena 13:45ean izango da eta ordu erdi geroago sari banaketa. Prestatutako platerak bazkalduko dituzte ostean, bazkari herrikoian. Arratsaldean izango du Laudio Harrok protagonismorik handiena. Izan ere, Yogurinha Borovak gidatuko du bazkalostea girotzeko bingoa. 18:30etan ekingo diote, ordea, aldarrikapena erdigunean jartzeari eta kalejira aldarrikatzaileak hartuko du herria. Berrikuntza gisa, zezen mekanikoa egongo da ostean, 20:00etatik aurrera. Gaua musika doinuekin amaituko da: Orekka erromeriarekin 22:00etan, eta Pakita Penas DJekin 1:30etik aurrera.