Carlos Arraindegia sinadura bilketa egiten ari da. Izan ere, negozioa Alberto Acero plazako azokan kokatuta dago eta jabeek eraikin horren ezjabetza behartu dute, egungo egoeran gastuak sortzen baitizkie, diru sarrerak baino. Ondorioz, Udalak bere gain hartu beharko du eraikina eta horrek izugarri zailtzen du dendaren biziraupena, ezin baita bi partikularren arteko kontratua erakunde publiko baten eta partikular baten artekoa bilakatu.
Berez, azoka osoan geratzen den establezimendu bakarra da, apurka-apurka guztiak itxi baitituzte eta, azkenik, arraindegia baino ez da geratu. Proiektuak 20 urte baino gehiago ditu eta biziraupena zaila ikusten du.
Horregatik, hain zuzen, sinadura bilketa abiatu dute. Momentuz, 200 baino gehiago jaso dituzte, tokiko erakundeari eskatzeko Abasto plaza berrian postu bat esleitzea.
Udala prest dago "ahal den guztian laguntzeko", baina zaila ikusten du aldarrikapen hori betetzea. Izan ere, Abasto plazan bost salmenta postu baina ez dira egongo. Hiru jadanik aurretik zeudenentzat izango dira (orain Zubiko Kurajo kokatu dituztenak) eta oraindik zehazteke dago beste biak zertara bideratuko dituzten. Edonola ere, helburua zehaztuta ere, Udalak lizitazio bidez esleitu beharko lituzte, hau da, ezingo lizkioke zuzenean inori eman.