Ez dute atsedenerako tarterik utziko Ugarteko jaiek. Uztailaren 31tik abuztuaren 3ra luzatuko dira auzoko festak, eta egitarauak goizetik gauera arte iraungo du lau egunetan. Nahita egin dute horrela. Jai Batzordeko kideentzat “oso garrantzitsua” da “lau egunak biziak edo intentsuak izatea”.
Horretarako, adin ezberdinetako pertsonentzako ekitaldiak egingo dituzte uneoro. “Hori duela pare bat urtetik hona lortu dugun zerbait dela uste dugu eta, egitaraua ikusita, agerikoa den zerbait da”, nabarmendu diote Aiaraldea Komunikabideari.
Funtsean, aurreko urteetako hezurdura bera izango du aurtengo ospakizunak, ohiko osagaiekin: futbito txapelketen finalak, herri bazkaria, azoka, tortilla txapelketa edota herri kirolak, besteak beste. Musika eskaintza izango dira, seguraski, arreta gehien deituko duena. Auzo txikia izateko, puntako taldeak ekarri dituzte azken urteetan, eta aurten ere hala izango da. Skabidean taldeak jarriko dio erritmoa ostiral gauari, Izatefaltsua metal boskote amurrioarraren ostean. Larunbatean, aldiz, Zinkha, Nonbait erromeria eta Pakita Penas igoko dira plazako oholtzara.
Urte osoko lana
Jaiak abuztuan izan arren, antolatzaileek ez dute atseden handirik hartzen urtean zehar. Azaldu dutenez, irailean hasten dute prozesua, jaien balorazio orokorrarekin. “Bilera horretan hurrengo jaietan errepikatuko duguna eta egitarautik kenduko duguna erabakitzen dugu gutxi gorabehera”, zehaztu dute.
Azaroan hasten dira hurrengo festak antolatzen. Ideia zaparrada egiten dute lehenbizi, ekintzak proposatzeko. Ondoren, hilero biltzera pasatzen dira, eta ardurak banatzen dituzte batzordeko kideen artean. Bilera batetik bestera, WhatsApp taldearen bidez koordinatzen dituzte koordinatu beharrekoak.
Apirilean sakatzen diote motorrari. Bi astean behin biltzera pasatzen dira, egitaraua pixkanaka ixteko. Modu horretan lortzen dute programa ekainerako izatea. Baina lana ez da hor amaitzen. Behin egitaraua plazaratuta, bizilagunekin hitz egiten hasten dira, “euren parte hartzea sustatzeko helburuarekin”.