Ohiko osagaiak izango dituzte Aretako jaiek aurten ere. Aretako Jai Batzordeko kideak buru-belarri ari dira lanean uztailaren 24tik 27ra luzatuko diren ospakizunetako egitaraua osatzeko.
Uztailaren 24an Aretako Kultur Etxetik jaurtiko dute txupinazoa, herriko buruhandi eta hanka-palo taldearen eskutik. Lehen suziriak eztanda egin bezain laster festa giroak Aretako bazter guztiak hartuko ditu.
Aurreko urteetan bezala txapelketa gastronomikoak, herri bazkariak, tailerrak edota kalejirak eguneroko ogia izango dira Aretako jaietan. Kirol ekitaldiek ere tokia izango dute egitarauan: pilota partidak, herri kirol erakustaldiak, mendi irteerak… Kirol ekitaldien artean Aretako VII. Trail Lasterketa izango da protagonista. Uztailaren 26an egingo dute eta honezkero zabalik dago izena emateko epea. Gainera,korrikalari gazteenentzako Trailtxiki lasterketaren bigarren edizioa egingo dute aurten ere.
Herritik eta herriarentzat
Aretako Jai Batzordeak gaueko giroa bermatzeaz gain, egun osoan herrian festa nagusi izatea du helburu. Hori dela eta, egun osoko programazioa osatzea da jaien atzean dagoen talde eragilearen apustua: “Adin eta gustu guztientzako egun osoko egitaraua osatzea da gure asmoa, ditugun muga ekonomikoen barruan”. Horretarako goizetik iluntzera luzatuko den programazio musikala ari dira lotzen; tokiko trikitilari eta txistulariekin eta baita gaueko kontzertu eta erromeriekin ere bai.
Aretako Jai Batzordetik Aretako jaien izaera herrikoia azpimarratu dute: “Ilusio eta gogo izugarriak jarri ditugu jaien antolakuntzan”. Herritarrei egitarauan modu aktiboan parte hartzeko deia luzatu diete. Zalantzarik gabe Aretako herri nortasunaren isla izango dira beste urtez batez Aretako jaiak.
Ohikoan bezala, musikak ere protagonismo nabarmena izango du jaietan. Antolatzaileek aste honetan bertan jakinarazi dute zeintzuk izango diren aurten oholtzara igoko diren taldeak:
