Egitarau oparo bezain anitza prestatu dute Orbeko Etxearen XXIV. urteurrenerako, eta hori argi geratu da azken egunetan. Ostegunean tokiko sortzaileen emanaldi bateratua egon zen, Shashel Calderon olerkariaren, Leire Sanjurjo eta Paula Urquijo dantzarien eta Iaiaiai irrintzilari taldearen eskutik.
Ostiral arratsaldean, aldiz, haurrentzako jarduerak izan ziren nagusi Gardea auzoko baserri okupatuan, eta larunbatean iritsi zen kontzertuen txanda, Ira Et Decessus, Fly Shit, Troika, Korasek, Kiratxa, Xispa and The Wild Pigs eta Parentesis 536 taldeekin.
Hiru egun falta dira oraindik egitarauari amaiera emateko. Gaur (ekainak 18) Enemigos del Imperio liburua eta errepresioaren kontrako txostena aurkeztuko dituzte.
Ostegunean, aldiz, hardcore doinuak nagusituko dira espazioan, Stone Leek talde japoniarraren eta Orbekon bertan entseatzen duen Erruki Jauna laukotearen eskutik.
Bukatzeko, egun osoko jaia egingo dute larunbatean, bermutarekin, bazkariarekin eta bingo musikatuarekin. Ondoren, arratsaldean, Crust Fit lehiaketa antolatuko dute, basket xtrem, igela, ping pong eta tokan jolasteko. Gauera arte luzatuko dute jaia gero, queimadarekin eta DJ Peru zein Noizean Noise kolektiboaren musika saioekin.
Argazkiak: Orbeko Etxea