Aiaraldeko Euskalgintza Kontseiluak sustatutako ekimenera batu eta Laudioko hizkuntzen mapa osatzeko lanari ekin zioten iazko ikasturtean Laudioko hezkuntza zentro guztietako ikasle eta irakasleek. Bildutako datuak sormen lanetan islatu eta ikusgai egon dira Kulturlab aretoan.
Erakusketatik harago, ikasgeletan egindako azterketa kalera ateratzeko lanean jarraitzen dute udalerriko ikastetxeek. Hizkuntza guztiak, 'Laudio bat' lemapean, afixak zabaldu dituzte herriko kaleetatik, "hizkuntzak nortasunaren parte" direla aldarrikatzeko asmoz. "Hizkuntza arrotzik ez dagoela" azpimarratu nahi izan du horrela Laudioko hezkuntza komunitateak: "Laudion entzuten den hizkuntza oro, herri honen parte da".
Bideoa ere plazaratu dute, Laudioko etxeetan erabiltzen den hizkuntza aniztasuna ikustarazteko:
Laudioko Hizkuntzen Mapa osatu dute Laudioko La Milagrosa, Lamuza, Laudio ikastola, Latiorro, Aretako Herri eskola eta Laudioko BHIk. Jasotako emaitzak kartelen bidez zabaldu dituzte ikastetxe eta herrian eta gaur bideo honekin Laudioko hizkuntza aniztasuna erakutsi digute. pic.twitter.com/Nt5m1b0wh5
— Aiaraldeko euskalgintza kontseilua (@eusk_kontseilua) June 11, 2025
25 hizkuntza baino gehiago
Egindako azterketak erakutsi duenez, 25 hizkuntza baino gehiago erabiltzen dira Laudion, eta 40 jatorri baino gehiago identifikatu dituzte. Hauek dira zerrendatutako hizkuntza guztiak:
- Euskara
- Gaztelania
- Arabiera
- Amazigha
- Errumaniera
- Errusiera
- Portugesa
- Galiziera
- Katalanera
- Ingelesa
- Ukrainera
- Txinera
- Frantsesa
- Alemana
- Italiera
- Brasilera
- Japoniera
- Darija
- Hassaniera
- Urdua
- Txekiera
- Asturiera
- Kitxua
- Igboa
- Bambara
- Nepalia
- Pakistania
- Hungaroa
- Guarania