Behera erori da Laudioko Udal Merkatuko sabaia

Aimar Gutierrez Bidarte 2025eko ekainaren 26a
Deskargatu Info Ahotsak :

Oraindik ez dakite espazioa noiz egongo de berriro erabilgarri. / Aiaraldea.eus

Laudioko Udal Merkatuko sabaia behera erori da gauean, kalte material ugariak sortuz. Merkatua itxita egongo da gaur eta, aurreikuspenen arabera, horrela jarraituko du datozen egunetan ere.

Ateak itxita esnatu da gaur Laudioko Udal Merkatua, eta aurreikuspenen arabera horrela jarraituko du datozen egunetan ere. Gauean merkatuko sabaia behera erori eta erabilgaitz utzi du espazioa.

Segurtasun kameretako irudien arabera, 22:30ak aldera gertatu da ezbeharra. Merkatuko saltzaileek Aiaraldea Komunikabideari adierazi diotenez, denbora zeramaten sabaiaren egoera kaxkarraz ohartarazten. Gertatutakoa "arazo askoren pilaketaren ondorio" dela azaldu dute. Izan ere, espazioak hezetasun arazo ugari ditu, gainean duen eta hutsik dagoen etxebizitzatik eratorriak. Hori gutxi ez, eta merkatuko aireztapen hodiak eta aparatu elektrikoak pladurrezko sabai-faltsura iltzatuta zeudela seinalatu dute merkatariek. 

Udala, bere aldetik, egoera aztertzen eta erantzukizunak zehazteko lanetan ari da. Tokiko erakundetik Aiaraldea Komunikabideari adierazi diotenez "zerbitzua lehenbailehen berreskuratzen" saiatuko dira.

Istripua gauean gertatu izanagatik generoa hotz-ganberan babestuta aurkitu dute merkatariek, baina merkatuko azpiegitura salmentarako erabili ezin badute gehiena bota beharko dutela azaldu diote Aiaraldea Komunikabideari. Oraindik kalteen tamaina baloratzen ari dira, eta ez dakite merkatuak noiz zabaldu ahalko dituen berriz ateak.

Albistea eguneratzen joango gara.

Jendartea Laudio

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide