Hardcore Hits Cancer jaialdia V. ediziora helduko da irailaren 20an. AFANOC elkartea laguntzea helburu duen egitasmoa Sorgin Tabernan egingo dute berriro eta eguerdian hasiko da bermut kontzertu batekin. Zita horretan Hertx izango da protagonista. Gasteiz, Bilbo eta Arrigorriagako kideak ditu banda horrek, hardcore melodikoa jorratzen dute eta 13:00etan ekingo diote.
Gauean tokiko bi talde igoko dira oholtzara: Erruki Jauna eta Zutik. "Talde guztiak dira lagunak eta Erruki Jaunak Kataluniako adiskideekin argitaratu du diskoa. Zutikek iaz Portugaleten egindako Hardcore Hits Cancerren kontzertuan jo zuen eta aurten Laudion egitea ahalbidetu dugu", argitu du Isra Fernandezek, antolakuntzako kideak.
Horrez gain, kanpoko musika proiektuak ere bertaratuko dira. Bik errepikatuko dute. Turbofuckersek jadanik jo du jaialdian eta iazko bermutean aritu ziren Malacopa ere sartu dituzte kartelean. "Iaz lan txukuna egin zuten eta jendea pozik geratu zen eurekin, hortaz, merezi zuten gaueko kontzertuan egotea", azaldu du Fenandezek.
Azkenik, Milícians streetpunk eta oi! taldea ere gonbidatu dute zuzenean jotzeko.
Kamiseta bereziak eta laguntza gehiago
Aurtengo kontzertura begira, antolatzaileek aurreratu dute kamiseta berezia sortuko dutela dirua biltzeko. Gogoratu beharra dago merchandising horren bitartez lortzen dutela AFANOC elkartea laguntzeko bitarteko ugari eta horrela errazten dute bere lana: minbizia daukaten adingabeen familiak babestea ekonomikoki.
Halaber, Isra Fernandezek azpimarratu du tokiko enpresa gero eta gehiagok babesten dutela ekitaldia eta oso eskertuta daudela. Iaz 4.500 euro eskuratu zituzten.