Laudioko EAJk prentsa oharra zabaldu du kritikatzeko, bere aburuz, EH Bilduk ez dituela bete aurrekontuetan islatutako konpromisoak; ez herritarrekin hartutakoak, parte hartze prozesuen bidez, ezta oposizioko taldeekin adostutakoak ere.
Zehazki, jeltzaleek salatu dute honako partida hauek ez direla egikaritu: Gaztelekurako inbertsioak, adinekoentzako jantokia, haur-parkeak hobetzeko plana, Jesus Guridi plazarako proiektua idaztea edo tailer kulturaletarako partida handitzea.
"75.000 euro gehiago adostu zituzten kulturarako, eta gastu gehigarria 6.700 eurokoa izan da. Jesus Guridirentzat proiektuaren idazketa bultzatzea adostu zuten, eta ez da euro bakar bat ere bideratu", adierazi du Maite Cortazar zinegotziak.
Honako proiektu hauek ez direla garatu ere adierazi dute jeltzaleek: industrialdeak egokitzea, eraldaketa digitala, argiteria publikoa ordezkatzea, egoitza zaharra eraberritzea, Latiorroko sumendiaren inguruan esku hartzea, rokodromoko bainuak, futbito-eremua estaltzeko proiektua, Arraño auzorako hirugarren sarbidea edo Arrañoko gaztelua birgaitzea.
Hori egin ordez, EAJk kritikatu du egungo udal gobernu taldeak aurreko legealdiko proiektu handiak bultzatu dituela soilik: Laudioko Antzokia, Abasto plaza eta Lamuza Parkearen birgaitzea, alegia.