Uztailaren 2tik 5era bitartean lehiatu zen Bilbon, Txurdinagako kiroldegian, Espainiako Irristaketa Txapelketaren XXXIII. edizioa eta podiumera igotzea lortu zuen Ibone Suarez laudioarrak. Kadete-gazte kategorian eta modalitate librean parte hartu zuen eta hirugarren postua eskuratu zuen.
Horretarako, ekaineko lehen asteburuan Euskadiko Txapelketa irabazi zuen Suarezek. Txurdinagan jokatutako proban disko luze eta motzeko bi programa egin zituen "ia inperfekziorik gabe" eta horri esker lehen sailkatuen artean egon zen.
Azarotik ari da prestatzen lehiaketa laudioarra eta poztasun handia adierazi dio Aiaraldea Komunikabideari lortutakoarekin, denboraldi osoan eta duela zenbait urte egindako lana islatu baitu.
Hori dela eta, eskerrak eman dizkie bere familiari eta bere entrenatzaileei, bai diziplina askekoari zein dantza modalitatekoari. Berez, lau urterekin hasi zen Suarez kirola egiten eta hamaika urterekin parte hartu zuen lehenengo aldiz txapelketa batean.
Helburu berriak
Halaber, Lautxirrinka klubeko kirolariak azaldu du hirugarren postuak atea irekitzen diola Espainiako Selekzioan eta txapelketa gehiagotan aritzeko. Momentuz, Euskadiko Selekzioko kidea da.