Hasi dira Laudioko Jaiak. Eguerdian jaurti dute festetako lehen suziria. Jendetza elkartu da herriko kaleetan eta, tenperaturak altuak badira ere, are gehiago berotzen ari da giroa. Palestinaren aldeko argazki erraldoia atera dute kuadrillek, eta jai-giroa nagusi den arren, uneoro egon da presente palestinar herriaren aldeko mezua.
Jaien hasierarekin batera gora egin du tenperaturak Laudion. Eguerdian jaurti dute Baldarrak kuadrillako kideek txupinazoa udaletxeko balkoitik eta festak eztanda egin du herriko bazter guztietan.
Giroa, ordea, goizean goizetik joan da berotzen. Hain zuzen ere, txupineroen kuadrillak gosari herrikoia prestatu du Alberto Acero plazan, sabelak bete eta eztarriak freskatzeko. Ehunka lagun elkartu dira bertan, lehen suziriaren zain egon gabe, jaiei hasiera emateko asmoz.
Jaia ez dadin izan isiltasunaren konplize
Laudio-Palestina herri ekimenak eta Suziri Jai Batzordeak oso presente izan dute palestinar herria, eta Israelek Palestinaren aurka darabilen genozidioa. Argazki erraldoia atera dute txupinazoa jaurti baino minutu gutxi batzuk lehenago. Gainera, jai-kuadrilla guztien pankartetan ere txertatu dituzte Palestinaren aldeko elkartasun mezuak.
Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.
Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.
Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.
Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.
Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.
