Laudioko Mugimendu Feministako kideak Txosnaguneko oholtzara igo ziren Odoloste eguneko goizaldean, 5:30ak aldera, eraso matxista bat salatzeko asmoz.
Igande arratsaldean, aldiz, elkarretaratzea egin dute Alberto Acero plazan, bertan gertatutakoa azaldu eta gaitzesteko. Izan ere, azaldu dutenez, "txistuak, mehatxuak eta irain sexistak" jaso zituzten DJen musika itzali eta eszenatokira igo zirenean.
"Atzo 'Feministas, hijas de puta, poned la música', 'Feminazis' eta horrelako astakeriak entzun behar izan genituen", azaldu dute. Euren iritziz, erreakzio hori ez zen kasualitatea izan, "emakumeok eta pertsona disidenteok presentzia publikoa hartzearen ondorio zuzena" baizik, "herri osoaren aurkako eraso bat".
Jakinarazi dute hori egin zutenak ez zirela "nerabe desubikatu batzuk" izan, "ezta beste herrietatik etorritakoak" bakarrik.
Horri lotuta, jakinarazi dute hori egin zutenak ez zirela "nerabe desubikatu batzuk" izan, "ezta beste herrietatik etorritakoak" bakarrik. "Jende asko konplize izan zen, adin guztietakoak eta inguru guztietakoak, herrikoak barne", azpimarratu dute.
"Gorroto diskurtsoen gorakadaren" testuinguruan kokatu dute gertatutakoa, "faxismoak eta matxismoak atzoko irainen itxura hartzen dutela" ohartarazita. Horren aurrean, "feminismotik antolatzen eta borrokatzen" jarraituko dutela ziurtatu dute, eta horretarako deia luzatu diete herritar guztiei. "Bide horretan bustitzeko eta zikintzeko unean heldu da, eta zein aldean zauden erabaki eta pasibotasuna alde batera uztekoa", aldarrikatu dute.
Era berean, jai ereduaren gaineko hausnarketa bat eman behar dela aldarrikatu dute, "guztiontzako espazio seguru eta feministak" eraiki behar direlako, erasotzaileak "inguruko lagun, ezagun eta auzokideak baitira maiz".