Ibai Adrian Comesal musikari gazteak esperientzia bikaina izan du udan, lau kontzertu eskaini baititu Chicago Youth Simphony Orchestrarekin; Valladoliden, Granadan, Sevillan eta Cordoban, hain zuzen.
Izandako bizipenari buruz galdetuta, laudioarrak honakoa azaldu du: "Maila hain altuko orkestrarekin jotzea plazer handia izan da. Entsegu bakoitzean eta kontzertu bakoitzean sentitzen zen exijentzia, konpromisoa eta musikarako maitasuna. Soinu handi eta landu baten parte izatea deskribaezina da. Motibazio handia izan da niretzat aurrera jarraitzeko eta musikaz gozatzen jarraitzeko".
Areto handietan
Estatubatuarrekin egindako biran toki berezietan aritzeko parada izan du Ibai Adrian Comesalek eta horien artean bi azpimarratu ditu: "Aukera izan dugu auditorio ikusgarrietan jotzeko, hala nola Valladolid-eko Miguel Delibes-en edo Granadako Manuel de Fallan. Akustika eta edertasun bereziko tokiak dira, eta horrelako eszenatokietan jotzea pribilegio bat da, betiko gogoan izango dudana".
Proposamena Gazte Orkestra Sinfonikoaren bidez
Aiaraldearrari kontzertu sorta horretan parte hartzeko eskaintza Gazte Orkestra Sinfonikoan egoteagatik heldu zitzaion. "Tronboi baxua behar zuten eta orkestrarekin harremanetan jarri ziren. Hortik nire izena atera zen eta azkenean parte hartu ahal izan nuen!" argitu du musikariak.
"Hasieratik sentitu naiz zerbait berezi baten parte, eta aukera paregabea izan dut pertsona zoragarriak ezagutzeko, giza kalitate handikoak, eta musika bizitzeko eta ulertzeko modu berri bat deskubritzeko"
Hazteko bidea
Musikariak gehien azpimarratu duen aldea izan da ikasten eta hazten jarraitzeko bizipena izan duela: "Hasieratik sentitu naiz zerbait berezi baten parte, eta aukera paregabea izan dut pertsona zoragarriak ezagutzeko, giza kalitate handikoak, eta musika bizitzeko eta ulertzeko modu berri bat deskubritzeko: irekiagoa, elkarlan gehiagoz beterikoa, eta benetan inspiratzailea".
Halaber, amerikarren lan egiteko eredua ezagutzeko balio izan dio esperientziak: "Haiekin egun hauek partekatzeak hazten lagundu dit, bai musikalki eta baita pertsonalki ere. Nola lan egiten duten, nola erlazionatzen diren musikarekin eta elkarrekin… etengabeko ikasketa bat izan da. Ulertarazi didate gure lana bizitzeko modu asko daudela, eta guztiak bateragarriak direla, baldin eta errespetua eta pasioa badaude".
Edonola ere, dena ez da lana izan eta bisitak egiteko tartea ere izan dute. Horri esker leku enblematikoak ezagutu dituzte, Cordobako meskita, esaterako.