Maderas de Llodio greba mugagabean

Maderas de Llodio ixteko "lehen urratsa" izan daiteke 39 pertsonen kaleratzea, Enpresa Batzordearen ustez

Txabi Alvarado Bañares 2025eko irailaren 15a
Deskargatu Info Ahotsak :

Bihar egingo dute lehen greba eguna Maderas de Llodion. / Aiaraldea.eus

Gaur bildu da berriz Enpresa Batzordea zuzendaritzarekin, baina ez dute inolako akordiorik erdietsi. Bihar langile batzarra egingo dute "informazioa emateko eta etorkizuneko mobilizazio eta protestak erabakitzeko". 

Adostasunik ez Maderas de Llodioko langileen eta zuzendaritzaren artean. Gaur egin dute 39 langile kaleratzeko prozesuaren kontsultaldiaren bigarren bilera, eta ez da aparteko berririk egon, Enpresa Batzordearen hitzetan. "Bilera sindikatuek egindako galderei erantzutean oinarritu da, enpresak aurkeztutako dokumentazioaren inguruan justifikatu gabe dauden puntuei buruz", azaldu dute beharginen ordezkariek. 

Euren hitzetan, enpresak aurkeztutako dokumentazioa "guztiz arbitrarioa" da, eta informazio gehiago eskatu dute. Orain arteko pozisionamenduan mantendu dira: Enplegua Erregulatzeko Espedientea kentzea eskatu diote zuzendaritzari, eta hitzarmenaren negoziaziora itzultzea. 

Horrez gain, komiteko kideek ohartarazi dute, euren ustez, 39 langile kaleratzea "lehen urratsa" izan daitekeela, "epe ertainera Maderas de Llodio ixteko erabakia hartzeko". Nabarmendu dutenez, Laudioko ekoizpenaren %40 deslokalizatzea da enpresaren asmoa. 

Nabarmendu dutenez, Laudioko ekoizpenaren %40 deslokalizatzea da enpresaren asmoa. 

Egoera hori ikusita, greba eta mobilizazioetan parte hartzeko deia luzatu dute beharginen ordezkariek, eta iragarri dute bihar 14:00etan langile batzarra egingo dutela enpresaren atarian, informazioa emateko eta "etorkizuneko mobilizazio eta protestak" erabakitzeko. "Oso garrantzitsua da langile guztiek parte hartzea", azpimarratu dute.

Greba eta mobilizazio deialdiak

Biharko eta ostegunerako deitu dituzte greba egunak Maderas de Llodion. Txanda aldaketetan egingo dituzte piketeak lantegiaren sarreran, 5:00etan, 13:30ean eta 21:30ean. Horrez gain, bihar elkarretaratzea egingo dute 12:00etan lantegiaren aurrean, eta ostegunean Herriko plazan, ordu berean. 

Ostegun arratsalderako, aldiz, eskualdeko mobilizazioa deitu dute SOS Aiaraldearekin batera. 19:00etan abiatuko da manifestazioa Eroskiko biribilgunetik.  

Ekonomia Laudio

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide