Elkartasun keinu ugari jasotzen ari dira Maderas de Llodioko kideek, 39 kaleratzeen aurka egiten ari diren greba mugagabea dela eta. Gaur eskualdeko beste hainbat Enpresa Batzordetako kideak bertaratu dira lantegiaren sarrerara, elkarretaratze bateratua egiteko.
Ondorengo lantegietako ordezkariak atxikitu dira, besteak beste: Aiala Vidrio, Mubea-Inauxa, IFBS-GOFE, JEZ-Voestalpine, Amurrio Ferrocarril, Tubos Reunidos, Artiach, Fribasa, Tubacex, Megatech eta Envases.
Horrez gain, mozioak ere sinatzen ari dira eskualdeko enpresetan. Atxikimenduen zerrenda, beraz, handitzen joango da datozen egunetan.
Bihar, Herriko plazara
Grebaren jarraipena erabatekoa izaten ari da Laudioko egur fabrikan, eta langileek mobilizazio eta ekimen ugari dituzte prestatuta datozen egunetarako. Bihar, ostegunetako merkatua baliatuta, mobilizazioa egingo dute fabrikatik herriraino. 11:30ean abiatuko dira lantegitik, eta handik ordu erdira iritsiko dira Herriko plazara.
Baina, protesta hutsetik harago ere antolatzen ari dira bestelako jarduerak greba dinamizatzeko. Urriaren 2an, adibidez, kontzertu solidarioa egingo dute fabrikako atarian, eskualdeko bi talderekin: Cabron Dandy eta Ez Dok Bape.
Horrez gain, gaur bertan Laudio BHI institutuan egon dira bi grebalari, euren borrokaren nondik norakoak ikasleei azaltzen.
Argazkiak: LAB sindikatua