Greba mugagabearen beste egun bat izan dute gaur Maderas de Llodioko langileek, baina horrek ez du esan nahi jarduerarik izan ez dutenik. Hain zuzen, gaur Gasteizera jo dute, Eusko Legebiltzarraren eta Arabako Batzar Nagusien aurrean elkartzeko. 16:00etan elkartasun kontzertua izango dute lantegiaren aurrean, Cabron Dandy eta Ez Dok Bape taldeekin, baina goiza lurraldeko hiriburuan eman dute.
Grebalariek inplikazio falta leporatu diete erakundeei eta hori irudikatuta gelditu da Batzar Nagusietan, sindikatuek salatu dutenez. Izan ere, Enpresa Batzordeko kideek hitza hartu dute han euren egoera azaltzeko.
Sindikatuetako ordezkariek azpimarratu dutenez, alderdi politiko ia guztiek adierazi dute interesa galderak eginda eta elkartasuna adierazita. EAJ izan da hori egin ez duen bakarra, euren hitzetan.
Grebalarien ordezkariek aipatu dute, halaber, talde politiko guztiek kritikatu dutela atzoko kontrol saioan Saray Zarate Fernandez de Landa Ekonomia Garapen eta Berrikuntzako Diputatuak arrazoia eman izana Garnica taldeari. Halaber, alderdiek gaineratu dute diputatuak berriro ere egotzi ziola Aiaraldea eskualdeari toki gatazkatsua izatea.
Euren hitzartzea amaituta, grebalariek jarraitu dute kanpoan alderdietako ordezkariekin harremanetan eta adierazi diete ez dutela Ramiro Gonzalez Ahaldun Nagusiaren berririk eta inplikazio falta dagoela Arabako Foru Aldundiaren eta Eusko Jaurlaritzaren aldetik.
Argazkiak: Maderas de Llodioko grebalariak