Sanrokezar Erretiratuen Klubari buruzko ezohiko eta premiazko batzordea egingo du Laudioko Udalak datorren astelehenean, oposizioko talde guztiek hala eskatuta. EAJk, PSE-EEk eta Omniak tramitatu dute eskaera formala, “zentroan azken asteetan izandako gertakariak” direla eta.
Era berean, hiru taldeek eskatu dute erretiratuen klubeko zuzendaritza bilerara bertaratzea eta hitza hartzen lehena izatea. “Ekimen honen bidez, oposizioaren helburua da eragindako pertsonei ahotsa ematea eta Udal Gobernuari gardentasuna eta azalpenak eskatzea, orain arte oposizioko taldeei bizkarra emanda kudeatu den gatazka baten aurrean”, azaldu dute alderdiek.
Euren ustez, tokiko gobernu taldeak ezin du “arazo hori alde batera uzten” jarraitu, “ezta informazioa ezkutatzen ere”. Hiru taldeek gogorarazi dute gehiengoa dutela Udalbatzan eta, ondorioz, “bereziki larria” dela gai hau eurekin kontatu gabe lantzea.
Aiaraldea Komunikabidea Laudioko Udalarekin jarri da harremanetan gaiaz galdetzeko. Tokiko erakundeak jakinarazi du astelehen goizean egingo dutela oposizioko taldeek eskatutako batzordea, eta bertan landuko dutela gaia.