Akordiorik gabe bukatu da Garnica taldeak Maderas de Llodio lantegian aplikatu nahi duen enplegua erregulatzeko espedientearen kontsulta epea. Atzo egin zuten bi aldeek azken bilera Bilbon. Konpainiak, kaleratzeak 39tik 35era jaistea eta langile batzordearen iritziz "onartezinak diren neurri ekonomikoak" jarri zituen mahaigainean, langileen proposamenei entzungor eginez.
Langileek salatu dute, konpainiak ez duela produkzioa Laudion mantentzeko aukera behin ere aintzat hartu negoziazio prozesuak iraun duen bitartean. Gauzak horrela, Garnicak tematuta jarraitzen du ekoizpenaren %40 eskualdetik kanpo ateratzeko asmoekin. Beharginen iritziz, "plantillarekiko eta eskualdeko etorkizun industrialarekiko konpromiso falta" erakusten du jarrera horrek.
Negoziazioa akordiorik gabe bukatu ostean, Garnicaren esku dago orain kaleratzeen gaineko azken erabakia.
Asanblada eta agerraldia
Maderas de Llodioko langileek asanblada egin dute gaur goizean Laudioko Kultura Etxean, zuzendaritzarekin izandako azken bileraren berri jaso, eta negoziazio prozesuaren ostekoak adosteko. Langileek agerraldia egingo dute datorren astelehenean, urriak 13, goizeko 11:00etan, Laudioko lantegi atarian. Bertan argituko dituzte etapa berri honetarako aurreikusi dituzten urrats eta mobilizazioak.
