Arabako Foru Aldundiak Laudion dituen bulegoetara sartu dira Maderas de Llodioko langileak gaur eguerdian, lantegitik herrigunera egin duten mobilizazioaren ostean. Grebalariek zerrautsa bota dute bulegoetako ateetan, eta dozenaka lagun sartu dira barrura. Gainontzeko manifestariak, aldiz, atarian pilatu dira, errepidea denbora tarte batez moztuz.
Ertzaintza bertaratu da eta Mozal Legearekin mehatxatu ditu beharginak. Horrez gain, bulegoetatik ateratzen ez baziren, guztiak identifikatu eta auzipetu ahalko zituztela ere aipatu diete, “Aldundiko beharginak hertsatzeagatik”.
Gauzak hala, bulegoetatik ateratzea erabaki dute beharginek azken unean, jendearen txaloen artean, Ertzaintzako Brigada Mugikorreko agenteak lokalean sartzear zeudenean.
Ekintza honen bidez, erakunde publikoen “utzikeria eta inplikazio eza” jarri nahi izan dituzte mahai gainean. “Ramiro Gonzalez Arabako Ahaldun Nagusia behin eta berriro entzun dugu Aiaraldeko etorkizun industrialaz hitz egiten, baina hemen enpleguak suntsitzen jarraitzen dute, Foru Gobernuak beste alde batera begiratzen duen bitartean”, salatu dute.
Gauzak hala, “berehalako neurriak” hartzea exijitu diete bai Aldundiari eta baita Jaurlaritzari ere, “Aiaraldeko enplegu suntsiketa etengabearen aurrean”.
Eskualdeko mobilizazioa datorren ostiralean
Herritarrei, aldiz, “borrokan jarraitzeko mezua” luzatu nahi izan diete, eta iragarri dute eskualdeko mobilizazioa egingo dutela hemendik astebetera, urriaren 24an, 18:30ean Eroskiko biribilgunetik hasita.
Maderas de Llodioko langileek 28 egun bete dituzte gaur greba mugagabean, Garnicak Laudioko lantegian ezarri nahi duen Enplegua Erregulatzeko Espedientearen aurka.
Iragan astean amaitu zen espedientearen kontsulta epea, aldaketa nabarmenik gabe: Garnicak 39tik 35ra jaitsi du kaleratu nahi duen langileen kopurua, baina ekoizpenaren %40a kanporatzea bere horretan mantenduta. Langileen aburuz, bost alternatiba aurkeztu zaizkio zuzendaritzari, baina honek “entzungor” egin die aukera horiei guztiei.
Argazkiak: Aimar Gutierrez Bidarte