Atzo 38 greba egun bete zituzten Maderas de Llodioko langileek eta Laudioko udal osoko bilkurara jo zuten 18:00etan. Dozenaka beharginek hartu zuten tokia udal aretoan eta Ainize Gastaka alkateak jakinarazi zien alderdi guztiek adierazpen instituzionala onartuko zutela euren alde bilkura amaitu bezain laster.
Berez, EH Bilduk mozioa aurkeztu zuen udalbatzan eztabaidatzeko, baina talde politiko guztiek adostu zuten erakunde adierazpena egitea. Alkateak testuaren zirriborroa partekatu zuen grebalariekin. Ideia nagusiak izan ziren 35 beharginen kaleratzea eta ekoizpenaren %40aren deslokalizazioa salatzea, Garnica taldeari arduraz jokatzeko exijitzea eta instituzioei eskatzea ahal beste egitea enplegu suntsipena ekiditeko.
Langileen ahotsa
Maderas de Llodioko grebalariek eurek ere hitza hartu zuten ondoren eta 38. greba egunean azpimarratu zuten bost proposamen errealista ezberdin aurkeztu dizkiotela Garnica taldeari eta bere arduradunek ez dituztela aintzat hartu.
Halaber, informazioa ezkutatzea eta kaleratuak modu txarrean tratatzea leporatu diote enpresari: "35 kaleratuek kalte-ordaina jaso dute kontu korrontean kaleratze eskutitza izan baino lehen".
Bide batez, grebalariek iragarri zuten borrokan jarraitzeko asmoa dutela, produkzioaren %40 kenduta, lantegi osoa baitago arriskuan. Mehatxua txikia ez dela ere azpimarratu zuten, Aiaraldeko etorkizun industriala baita jokoan dagoena, bai Maderas de Llodioko langileentzat zein tokiko egur ekoizleentzat.
Azkenik, gogoratu zuten azken asteetan hainbat aldiz aldarrikatu dutena, hau da, Arabako Foru Aldundiaren eta Eusko Jaurlaritzaren jarrera ez dela nahikoa izan kaleratzeei aurre egiteko.