Astelehen goizean Tubacex enpresako behargin talde bat (sindikatu ezberdinetako kideekin) bertaratu zen Maderas de Llodioko piketera ekarpen ekonomikoa egitera. Zehazki, 4.320 euro eman zizkieten greban dauden langileei.
Egitasmoa LAB sindikatuko zenbait kidek jarri zuten abian: "Ikusita Langile Batzordeak ez zuela egiten, LABeko bost beharginek bildu genuen dirua eta aipatu beharra dago sindikatu guztietako hainbat lankidek egin dutela ekarpena, eta ez soilik LABekoek".
Elkartasun bilketa egin dutenek azpimarratu dute Tubacexeko greba izan zenean inguruko lantegi guztiek babestu zutela eta elkartasunak ez duela mugarik izan behar. "Ni kaleratuen zerrendan nengoen eta ezezagun askok lagundu gintuzten aurrera egiten, hori itzultzeko ordua da orain", adierazi du LABeko kideak.
Edonola ere, Tubacexeko langileek ez dute autokritika ekidin: "Egia da 142 langilek jarri dutela dirua, baina enpresa honetan askoz gehiago gara eta ez dugu ahaztu behar jaso genuen laguntza eta elkartasun uholdea".
Argazkiak: Tubacexeko langileak