Laudio BHI Institutuko DBHko 3. eta 4. mailetako 40 ikaslek inguruk eman dute izena Erasmus+ programaren hurrengo edizioan parte hartzeko. Ohikoan bezala, proiektuak bi ikasturte barne hartuko ditu, indarrean dagoen honetan bi bidaia egitea espero dute eta hurrengoan azkena.
Momentuz, Polonia da zehaztu duten helmuga bakarra. Asmoa da poloniarrak Aiaraldera etortzera martxoan eta tokiko ikasleek, aldiz, apirilean jotzea hara.
Halaber, Laudio Institutua harremanetan dago Alemaniako beste ikastetxe batekin, egonaldia eurekin trukatzeko.
Adimen Artifiziala
Egitasmoaren irakasle arduradunek azaldu dutenez, ardatz berriak dauka ekimenak eta nagusia Adimen Artifiziala da. Arlo horretako aditua Laudiora joango da ikasleak zein irakasleak trebatzera, modu egokian nola erabili behar den jasotzeko. Helburuak teknologia berrietan gaitasunak eskuratzea, praktika onen trukaketa edo ingelesa hobetzea izango dira, besteak beste
Hain zuzen, Udiarraga Abrisketa irakasleak aipatu du Adimen Artifiziala, inklusibitatea eta teknologia berriak uztartu nahi dituztela: "Alde batetik, gure ikasleei dagokienez, haien gaitasun digitalak eta beste hizkuntza batzuen ezagutza hobetu nahi ditugu, eta kulturen arteko sentsibilizazio handiagoa sustatu, bai eta gure hizkuntaren eta Europako beste herritar batzuen hizkuntzen ezagutzarekiko sentsibilizazioa ere".
Irakasleek ere izango dute zer egin: "Gaitasun digitalak eta berrikuntza pedagogikoak hobetu nahi ditugu, aniztasunari ematen dioten erantzuna eta jardunbide egokien transferentzia Europako beste ikastetxe batzuekin partekatuz".
Ikastetxean ere emaitza positiboak espero dituzte bi esparrutan: "Europar Batasunan jarduteko duen gaitasuna hobetu nahi dugu, eta bere dimentsio europarra indartu irakaskuntzan, praktika berritzaileak ikasiz, eskuratuz eta garatuz. Gure hizkuntzaren garrantziari buruzko sentsibilizazioa hobetu nahi dugu, bai eta komunitate osoak gure komunitatera datozen familien transmisore eta eragile integratzaile gisa duen zeregina ere".