Asteazkenean iragarri bezala, atzo bilera egin zuten Arabako Foru Aldundiko ordezkari politikoek eta Maderas de Llodioko grebalarien ordezkariek. ELAk adierazi du ez duela konfiantza handirik hitzorduak utziko dituen emaitzen aldetik, baina, hala ere, bi proposamen egin zizkioten langileek erakundeari.
Izan ere, Aldundiak aipatu zuen ez duela tresna nahikorik Garnica sakatzeko. Dena den, grebalariek uste dute badagoela bidea konpainiari aurre egiteko. Hain zuzen, beharginek azpimarratu zuten enpresaren 2023ko kontuetan bederatzi milioi euroko desfasea islatu dutela bi dokumentazio ezberdinetan.
Alde batetik, 2023ko jardunaldiari dagokionez, merkataritza-erregistroan 13 milioi euroko negozio kopurua jaso du. Aldiz, espedientearen azalpen memoria zenbaki bera 22 milioi eurokoa da.
Egurraren sektorea
Halaber, grebalariek uste dute badagoela beste modu bat egoeran eragiteko: egurraren sektorean eraginda. Berez, Garnicak argudiatu du egurraren prezioa oso garestia dela eta langileek uste dute Arabako Foru Aldundia harremanetan jar daitekela ekoizleekin salneurria murrizteko.