Laudioko Txosna Batzordeak komunikatua plazaratu du sare sozialetan, herritarrei deia egiteko urte osoan modu aktiboan parte har dezaten jaien prestaketan.
Batzordeko kideek jaietako egunetan entzun behar dituzten iruzkinak islatu dituzte, modu ironikoan, aurretiko antolakuntza lanetan inplikazioa eskatzeko: "Haurrentzako zerbait egingo duzue? Ze goiz ixten den bokata txosna! Eta ez dituzue aurten patatak jarriko? Inork ez ditu talde hauek ezagutzen! Beste erromeria bat? lazko dekorazio berdina da, ze sosoak!". Horrelakoak entzun behar dituztela adierazi dute, eta txosnaguneko leloa Egotetik egitera dela birgogoratu dute.
Hainbat taldek eta eragilek osatzen dute txosna batzordea, eta azaldu dutenez, ekintzak aurrera eramateko prozesuak du haientzat pisurik handiena, eta ez hainbeste egitaraua bera burutzea.
Hori dela eta, eta txosnagunea "denon ardura" dela aldarrikatuta, azaroaren 14an egingo den batzar ireki eta parte hartzailera joateko gonbita egin diete laudioarrei. Arratsaldeko seietan izango da bilera, Kultura etxean.