Ostegunean luxuzko gonbidatua izango du Faktoriak 19:00etan, Mikel Reparaz nazioarteko kazetariak oholtza hartuko baitu Ameriketako Estatu Batuetako arraza- eta klase-arrakalak azaltzeko. Nafartarra EITBko berriemailea izan zen Washingtonen 2013tik 2018ra bitartean eta tarte hori baliatu zuen herrialdeko hainbat txoko eta errealitate ezagutzeko, hiri erraldoietatik hegoaldeko mugaraino.
Edonola ere, Faktoriako doako solasaldiaren ardatza Estatu Batuen eta bere amets unibertsalaren arrakalak izango dira. Horren berri eman zuen kazetariak Las grietas de América liburuan eta Euskadi Saria jaso zuen 2021ean lan horregatik. 2024an Alberdania argitaletxeak euskaraz argitaratu zuen testua.
Entsegu hori hizpide hartuta, Reparazek azalduko du nola dagoen sartuta arrazakeria Ameriketako Estatu Batuen bizkarrezurraren medulan eta nola horren sustraiek lagundu izan duten Donald Trumpen gorakadan. Kazetariak historia, kultura, kazetaritza eta ikerketa bidaia proposatuko du eta ekarpen baliotsuak egingo ditu. Izan ere, Black Lives Matter mugimenduaren, terrorismo zuriaren ondorioen edota Alt-Right-aren (eskuin alternatiboa) lekuko zuzena izan da.
Hori eta gehiagori buruz jakiteko, hitzordua izango dute interesdunek bi egun barru Faktorian bertan 19:00etan.