Laudioko Udalak prentsaurrekoa eskaini zuen atzo Gabonetako egitarauaren berri emateko eta ekintza berria proposatu dute abenduaren 20tik 23ra bitartean. Izan ere, Kultura Etxea Olentzero eta Mari Domingiren eremua bihurtuko dute, umeek bisitatu dezaten. Parkean argi tunela topatuko dute herritarrek.
Horrez gain, eta lehen sektoreari bultzada emateko helburuz, abenduaren 24an eta 31n baserritar eta artisauen merkatua izango da Aldai plazan, eta Gabonetako etxolak egongo dira ere Herriko plazan, abenduaren 22tik 24ra arte eta 26tik 31ra arte.
Zinema
Ume eta gazteentzako zinema zikloa ere egongo da: Ipuinak lorategi magikotik, Maya emaidazu izenburua bat eta Gaztelua proiektatuko dituzte Kasinoan, 22an, 27an eta 28an. Azken filma 18 urtetik gorakoentzat izango da.
Ohiko Gabonetako Haur Parkea urtarrilaren 2an, 3an eta 4an izango da goizez eta arratsaldez kiroldegian, puzgarri eta tailerrekin.
Kirola eta musika
Kirolak ere bere tartea izango du Herri Eguberrien egitarauan urteroko San Silvestre lasterketarekin. Horrez gain, aurten ere aretarrek gonbidatu dute jende oro Alpitxura igotzera, abenduaren 31n, Aretako Kultura etxetik hasita. Martxa horren XI. edizioa izango da.
Musikari dagokionez, herriko abesbatzek eta musika elkarteek ere parte hartuko dute Eguberriko kontzertuak eskainiz, eta musika animazioa egongo da ere beste talde batzuen eskutik.
Eguberri argiak piztea
Abenduaren 19an egun oso berezia biziko du Laudiok, Eguberri argiak piztearekin. Ekimena arratsaldeko seietan hasiko da Herriko plazan. Ondoren, ikazkinari harrera egingo zaio Ugarteko plazan. Zortea probatu nahi duten gazteek izena eman dezakete udaletxean, kiroldegian eta liburutegian jarri diren postontzi fisikoetan, ostiralera arte.
Olentzero eta Mari Domingirekin hitzorduak
Kultura etxean ez ezik, Olentzero eta Mari Domingi San Joan Astobitzan egongo dira eta bere bila joateko Laudioko Herriko plazan elkartuko dira abenduaren 21ean, 11:30ean. Nola ez, 24an ohiko kalejira jendetsua egingo dute momotxorro eta galtzagorriekin.
Urtea amaitzeko, photocall ibiltaria egongo da abenduaren 31n eta Meltxor, Gaspar eta Baltasar errege magikoek ere Laudio bisitatuko dute, baina urtarrilaren 5ean. S.R.C.G. Rakatapla Elkarteak Ekialdeko Errege Magoei lagunduko die eskutitzak biltzen abenduaren 27an Herriko plazan.