Laudioko EAJk prentsa oharra plazaratu du, bere ustez, Eguberriko argiak beranduegi piztuko direlako. "Energia aurreztea edo jasangarritasuna argudiatuz argiak piztea atzeratzea aitzakia bat da: frogatuta dago Gabonetako argiztapenak herritarrak animatzen dituela, giroa sortzen duela eta gure kaleak biziarazten dituela", aipatu du Maite Cortazar zinegotzi jeltzaleak.
Ordezkari politikoak garrantzia handia eman dio argiztapenari eta egitarau zabalagoa ere eskatu du: "Gabonetan ekonomia aktibatzen da, baita kultura, animazioa eta ilusio kolektiboa ere. Laudiok distira hori berreskuratu behar du: egun hauetan itzaltzen jarraitzen duen herriak elkartzeko, parte hartzeko eta gozatzeko aukerak galtzen ditu. Egitarau oso bat behar dugu, argi gehiagorekin, kultur ekitaldi gehiagorekin, giro handiagoarekin eta Laudio berriro ilusionatzeko moduko jarduera gehiagorekin".
Planifikazio falta
Horrez gain, oposizioko talde garrantzitsuenak aurreikuspen falta leporatu dio udal gobernu taldeari, argiak pizteko ekitaldia eta Ugarteko ikazkinaren bisita ordu erdiko tartearekin egingo baitira.
Berez, EAJk uste du Laudiok Amurrioko eredua jarraitu beharko lukela eta bihar bertan piztu argiak. "Atzerapen horrek murriztu egiten du Gabonetako denboraldiak bisitariak erakartzeko duen gaitasuna, eta oraindik abiatu ez diren kultura- eta jai-ekitaldietan parte hartzea mugatuko du".