Gabon latzak izango dituzte Aiaraldean hainbat familiak Maderas de Llodioko greba dela medio. Langileek 83 egun bete dituzte piketean kaleratzeak eta deslokalizazioa gelditzeko eta, momentuz, animotsu ari dira borrokan.
Gaur manifestazio oso jendetsua antolatu dute herrian. Plazatik abiatu eta Zumalakarregi etorbidea hartu ondoren, lantegira jo dute, non suziriak eta bengalak ez diren falta izan. Bidean beharginek eurek hartu dute megafonia eta amorru oihuak eta barre algarak uztartu dituzte umorez.
Behin enpresara helduta, ekitaldia prest zuten han eta mezu argia zabaldu dute: greba eta presio tresnak direla soilik eraginkorrak Garnicaren zuzendaritzaren kontra eta horregatik grebari eutsiko diotela.
Gabonetako elkartasun zozketa
Erresistentzia deiarekin batera, SOS Aiaraldeak aipatu du Gabonetako elkartasun zozketa abiatu dutela eta zenbakiak erosi ez ezik, piketean produktuak uzteko aukera ere egongo dela. Amaitzeko, grebalariek topa egin dute mobilizazioa animoz bukatzeko.
🔴 Urtea amaitzear dagoen honetan, beharrezkoa da elkartasun olatuari eustea. Greba fruituak ematen ari da. Garnica multinazionalak negoziatzera derrigortuta ikusi du bere burua, baina bidea geratzen da oraindik egiteko. pic.twitter.com/bCrawTOHoO
— Aiaraldeko Greba Batzordea (@AiaraldeaGreba) December 11, 2025