Altzarrate Sariek X. edizioa izan dute igandean eta efemeridearen tamainako ekitaldia antolatu dute Kasinoan. Oholtza, aurkezlea eta Ximenaren abestiak izan dira garaikurren banaketarako osagaiak eta irabazleek poztasunez jaso dituzte.
Oscar Ruiz CD Laudioko jokalariak azpimarratu du ohorea dela berarentzat herriko gazteek erreferentetzat hartzea eta ziurtatu du taldearekin 3. mailan jokatzea dela bere kirol ametsa.
Laudiar Txirrindularitza Elkarteak, bere aldetik, gogoratu du klubak 65 urte bete dituela eta, horregatik, hainbat sortzaile omendu nahi izan ditu, oholtzara igotzea eskatuta.
Felix Mugurutzak umorez hartu du garaikurra eta aipatu du bere helburua zela kirolari onenaren saria jasotzea. Txantxak alde batera utzita, Mugurutzak aldarrikatu du ezinbestekoa dela Laudioko ondarea berreskuratzea eta mantentzea.
Uxue Palacios izan da, hain zuzen, kirolari onenaren aitortza eraman duena eta aitortu du bere xedea dela bere diziplinako onenekin lehiatzea etorkizunean.
Areta Herri Eskola izan da azken garaikurra hartu duen irabazlea eta horretarako hainbat ikaslek hartu dute oholtza. Txetxu Urkijo zuzendariak gogoratu du ikastetxeak 100 urte bete ahal izateko jende ugarik lagundu behar izan duela aurretik, egungo belaunaldia heldu baino lehen.
Behin banaketa amaituta, Peli Ortiz de Zaratek hartu du hitza balioan jartzeko Altzarrate elkartearen ibilbidea eta bertaratukoei eskatu die mezu bat grabatzea ospitalean dagoen kide bati. Azkenik, sarituek euren omenezko aurreskua jaso dute.