Abenduaren 2an 180 gazte bildu zituen Kasinoan eta Lezeaga Aretoan XARE egitasmoak. Jardunaldi horietan hamaika lanabes jarri zituzten gazteen eskura: musika autoekoizteko hastapen-tresnak, argazki-teknika berriak, robotika, bideo-jokoak, errealitate birtuala, 3D inprimagailuak, app-ak nork bere neurrira sortzeko lanabesak, Adimen Artifiziala, pribatutasuna sarean kudeatzeko gailuak...
Horretarako, eskarmentu handiko aditu eta profesionalak etorri ziren eskualdera eta arlo anitzak jorratu zituzten. Izan ere, arrasto digitala eta sare sozialen kudeaketa arduratsua landu zituzten, besteak beste.
Honako proiektu hauek bertaratu ziren: Eragin komunikazioa, Talaios kooperatiba, Elurmaluta, Gisa software librearen aldeko elkartea, Emaize sexologia zentroa eta Mundu Berriak berrikuntza sexologikorako irabazi asmorik gabeko elkartea, Codesyntax, Protomakers club, Katubi ikus-entzunezkoak, Game Erauntsia euskarazko bideojokozaleak eta DJ Makala, besteak beste.
Internetek sortzen dituen erronkei aurre hartzea
Hainbat erronkaren bitartez, sare sozialetan gertatzen diren egoera errealak aztertu zituzten gazteek: gorroto-diskurtsoak antzematen, ligatzerakoan 'red flag' eta 'green flag' seinaleak identifikatzen, sexting-ari buruz gogoeta egiten eta 'fake news' edo gezurren aurrean nola jokatu hausnartzen.
Gelan izan zituzten material fisikoak ez ezik, telefonoetan instalatutako app bat erabiliz QR kodeak eskaneatu, arrastoak bilatu eta, lankidetzan, erabaki kolektiboak hartu zituzten.
Laudioko Udalak (Nagore Gomara zinegotziak parte hartu zuen), Aiaraldeko Kuadrillak, Arabako Foru Aldundiak eta Eusko Jaurlaritzak babestutako saioak Zaraobe BHIko, Laudioko Lanbide Heziketako, Laudioko Institutuko eta Laudio Ikastolako 180 ikasle elkartu zituen.
Argazkiak: XARE Euskarazko Kultura Digitalaren Jardunaldiak