Atzo lan heriotza berria gertatu zen Laudion eta gertakari ez traumatikoa izan zen. J.D.B. izeneko 58 urteko garraiolaria Eroski Cityn (Lamuza kalean) ari zen banaketa egiten, txarto sentitzen hasi zenean. Baliabide medikuak agertu arren, ezin izan zuten salbatu.
Langilea autonomoa zen eta familia enpresan lan egiten zuen. Edonola ere, hori ez zen izan atzo gertatutako heriotza bakarra Euskal Herrian. Izan ere, Azagran 59 urteko gizarte langile bat ere zendu zen lanean ari zela. Zehazki, etxe batera joaten ari zen, eta, ondorioz, in misiotzat jo dute kasua.
LAB sindikatuak informatu du bi gertakariei buruz eta sindikatuak gogoratu du jadanik 74 behargin hil direla 2025ean. Senide, lankide eta lagunei babesa adierazi die erakundeak, baina salaketa mezua ere zabaldu du: "Argi daukagu, lan istripuak, traumatiko, ez traumatiko eta joan etorrikoak, ez direla zoriak edo kasualitateak sortutakoak, ematen diren lan harremanen, prekarizazioaren, lan arautegien eta azpikontratazioaren emaitza dira. Horregatik diogu gertatzen diren lan-istripu gehienak guztiz ekidin daitezkeela, eta horretarako borondate politikoa baino ez dela behar, lan eskubideak bermatzeko eta errespetatzeko neurriak jartzeko, baita erakunde publiko eta enpresa guztien inplikazioa ere. Prekaritatearekin amaitu behar da".