Omenaldi xume bezain hunkigarria egin zieten Dolores Oliva Garcia eta Francisco Salgado Gonzalezi 2025eko azken egunean Ugarten. "Ezagutzen ez dituzuenentzat, bizitza gehiena auzoan eman duten bi pertsona direla esango dizuegu. Eta haien parte-hartzearekin eta auzokoekin duten harremanarekin elkarbizitza atseginagoa egin dutela", azaldu zuten auzoko plazan eginiko ekitaldian.
Nabarmendu zutenez, "auzoan gertatu diren aldaketa askoren lekuko" izan dira bi bizilagunak, baina aldarrikatu zuten, aldaketa horiek gainetik, "auzotasuna" dagoela, "auzo bera partekatzen dugun pertsonen arteko harremana", eta horren "adibide polita" direla Oliva eta Salgado: "gure artean zaintzen bagara, auzokoaren beharrei erantzuten badiegu, askotan horiek 'familia' bihurtzen direla".
Gauzak hala, hamarkadetan zehar auzoan izan duten presentzia goraipatu zuten ekitaldian: "Dolores, Francisco, bizitzako gorabeherak gainditzeko eta gainditzen jarraitzeko gaitasuna duzuela adierazi diguzue, eta ziur gaude ez zirela gutxi izango. Horregatik eta auzoko guztiokin duzuen harreman zoragarriagatik, eskerrak ematen dizkizuegu eta omenaldi txiki hau egiten dizuegu".