Garnicako zuzendaritzak alde bakarrez itxi du Maderas de Llodioko lan gaztaka konpontzeko negoziazioa, langileen ordezkariek salatu dutenez. Iragan ostegunean egin zuten azken bilera zuzendaritzaren eta Enpresa Batzordeko kideen artean baina, azken hauek salatu dutenez, multinazionaleko buruek “proposamen bakarra” jarri zuten mahai gainean bertan: “enpleguaren suntsiketa handitzea eta negoziazioarekin jarraitzeari uko egitea”.
Jarrera hori “onartezina” dela uste dute beharginen ordezkariek, “dagoeneko larria eta konplexua den lan-gatazka are gehiago okertzen” duelako. Horri lotuta, sindikatuek salatu dute enpresak ez duela onartu ezta abenduan landutako planteamendua: “Proposamen hori adostua izan zen eta langileek gehiengo zabal batez berretsi zuten, eta gatazkari benetako irtenbidea ematen zion. Jarrera hau negoziatzeko borondate faltaren erakusgarri argia da, eta edukirik gabe uzten du benetako eta fede oneko negoziazioari egiten zaion edozein erreferentzia”.
"Epaiketak ez du egoera konponduko"
Blokeo egoera horren aurrean, komiteak berretsi du gatazka konpontzeko bide bakarra “negoziazioa eta akordio batera iristea” dela. Izan ere, ziurtatu dute Enplegua Erregulatzeko Espedientearen epaiketak (otsailaren hasieran izango denak) ez duela egoera konponduko, “eta negoziazioa alde bakarrez ixteak gatazka are gehiago larriagotzea besterik ez du ekarriko, enpresaren egungo testuinguruan nekez uler daitekeen zerbait”.
Gauzak hala, “ziurgabetasun guztia langileen gain uztea” leporatu diote Garnicako zuzendaritzari, eta bere erantzunkizunei ihes egitea. Ondorioz, “negoziazioari seriotasunez eta erantzukizunez berriro ekiteko eta negoziatzen ari ziren baldintzetan proposamen bat aurkezteko” deia luzatu diote multinazional errioxarrari, “pilota euren teilatuan” dagoela nabarmenduta.
124 egun greban
124 egun bete dituzte Maderas de Llodioko langileek gaur greba mugagabean, Garnica multinazionalak Laudioko egur fabrikan burutu dituen 39 kaleratzeen aurka.