Areto hockeyaren epizentro bilakatu da asteburuan Laudioko Granja kiroldegia. Izan ere, modalitate horretako gizonezkoen ohorezko mailako Espainiako txapelketako sektore fasea jokatu dute bertan estatuko bost taldek: Ganbegi HT, Linia 22 HC (Terrassa), CSA Ourense, CH Benalmadena eta Codema HC (Gijon).
Partidu zailak izango zirela aitortu zioten Urko Ruiz eta Gentza Diaz jokalariek Aiaraldea Komunikabideari lehenengo norgehiagokaren aurretik eta, zoritxarrez, ez dute desiatutako emaitza lortzerik izan. Hala ere, "emaitza ona izan ez den arren, errendimendu bikaina izan dute", Hector Borge Ganbegiko arduradunaren arabera.
Larunbateko lehenengo partidan Benalmadenaren kontra lehiatu zen Ganbegi eta, nahiz eta "oso ondo jokatu", 1-3ko emaitzarekin amaitu zuten. Bigarrenean, ordea, 6-6ko berdinketa lortu zuten, eta puntu garrantzitsu bat lortu zuten horrela.
Igandean Linia 22 kataluniarren aurka jokatu zuten herrikoek eta beste berdinketa bat erdietsi zuten, 4-4ko markagailuarekin oraingoan. Azkenengo norgehiagoka CSA Ourenseren aurka galdu zuten, 6-5eko emaitzarekin.
Gauzak horrela, bi puntu baino ezin izan zituzten lortu laudioarrek, eta hurrengo faserako sailkatzerik ez.
Azken sailkapena honako hau izan zen:
- Benalmádena - 10 puntu
- Linia22 HC - 7 puntu
- CSA Ourense - 4 puntu
- Codema HC - 3 puntu
- Ganbegi HT - 2 puntu
Hauek izan ziren Ganbegiko jokalarien adierazpenak haien lehenengo partida hasi baino lehen: