Laudioko EAJk oharra zabaldu du salatzeko Aldai plazako aparkalekuko oinezkoen sarbideak ez duela betetzen segurtasun irizpidea. Jeltzaleek aipatu dute iaz azaldu zutela lehen aldiz eta ez zela aintzat hartu euren ekarpena, baina azkenean Tokiko Gobernu Batzordean onartu dela arazo bat dagoela.
Berez, Gobernantza Feministaren arloak berretsi du publizitate-panelak jartzeak nabarmen murriztu duela esparruaren bi sarreretako ikusgarritasuna, eta gune ez-segurua sortu duela inguruan dabiltzanentzat. Genero-ikuspegitik, azpimarratu du ikusgarritasuna —"ikustea eta ikusiak izatea"— funtsezko elementua dela, eta, kasu honetan, benetako segurtasuna zein hautemandakoa kolokan daudela.
Gauzak horrela, Maite Cortazar zinegotziak exijitu du, jakinda arazoa dagoela, ahalik eta lasterren esku-hartzea Laudioko Udalak egoera konpontzeko.
Oposizioko ordezkariak berdintasuna jarri du bere kritiken erdigunean: "Laudio bezalako udalerri batean, berdintasunarekin eta politika feministekin bereziki sentsibilizatuta, ezin dugu onartu benetako segurtasuna eta hautemandakoa zalantzan jartzen dituen espazio publikorik egotea. Jaso ditugun kexa asko aparkalekua erabiltzen duten emakumeenak dira, bereziki arratsaldean eta gauean. Segurtasuna ezin da adierazpen instituzionaletan geratu; erabaki zehatzak hartu behar dira".
Udal gobernu taldearen erantzuna
Aiaraldea Komunikabideak Laudioko udal gobernu taldeari galdetu dio arazoari buruz eta bere erantzuna honako hau izan da: "Guretzat premiazkoa da irtenbide bat ematea eta herritar guztien segurtasuna bermatzea. Harremanetan gaude parkingaren arduradunekin, eta instalatutako publizitate-paneletan aldaketak edo moldaketak egiteko konpromisoa hartu dute. Bestalde, Laudio Udalak bere konpromisoa berresten du berdintasun politika publikoekiko".